Illa undirbúnar skattalagabreytingar og allt of seint á ferðinni

Ég get tekið undir flest það sem samtök atvinnulífsins senda frá sér varðandi athugasemdir um skattabreytingar stjórnvalda.

Ég vil bæta við að það hversu seint þetta er á ferðinni veldur bæði verulegum vandræðum í atvinnulífinu sem og umtalsverðum kostnaðarauka fyrir fyrirtækin og sömuleiðis stjórnvöld.

Ég hef ekki sérstakar áhyggjur af hækkun á vsk úr 24,5% í 25% um áramótin en breytingin þann 1.mars þegar sérstakt 14% þrep verður tekið upp varðandi suma þjónustu er bæði vanhugsað sem og erfitt í framkvæmd.

Sú breyting sem mestum erfiðleikum kemur til með að valda er hið nýja fjölþrepa tekjuskattskerfi sem setur allt á annan endann.  Það eru rétt rúm vika þangað til launaútreikningavinna hefst hjá hjá hinu opinbera, tryggingastofnun, sveitarfélögum og öðrum þeim sem greiða út fyrirfram laun fyrir hvern mánuð.  Fyrir þann tíma verður hvorki búið að fjalla um breytingarnar á Alþingi hvað þá samþykkja.  Þetta veldur því að við útborgun 1.febrúar sem og e.t.v. 1.mars líka verður um verulegar leiðréttingar á fyrri útreikningum að ræða og launaseðlar og uppsöfnun ársins fer í tóma vitleysu.  Sama á ekki síður við um hinn almenna markað.   Málið er að launakerfin eru í dag hönnuð fyrir 1 skattþrep og það þurfti að gera verulega mikinn "bútasaum" á þessum kerfum í sumar þegar hátekjuskattur var tekinn upp í staðgreiðslu.

Nú á að flækja skattheimtuna í staðgreiðslu af launum verulega og það kallar á svo miklar breytingar á launakerfum að það þarf nánast að forrita þau alveg upp á nýtt.  Ekki í neinu kerfi sem ég þekki til er hægt að smella inn mismunandi prósentum með þeim hætti sem stjórnvöld leggja til.  Auk þess verður kerfið svo ótrúlega vitlaust að það tekur ekki neinu tali.  Starfsmenn sem vinna á mörgum stöðum þurfa að láta vita sjálfir í hvaða þrepi þeir eiga að lenda og það er bara nánast útilokað að ætla einum launagreiðanda að setja laun í milliskattþrepið ef maður vinnur sem dæmi fyrir minna en 200.000 á mánuði hjá nokkrum aðilum.

Ástandið 1.ágúst 2011 verður skelfilegt þegar álagningarseðlarnir koma með öllum sínum breytingum fram og til baka og ástandið verður svipað og hjá fólki fyrir daga staðgreiðslukerfisins að menn gera ekki annað á haustmánuðum en að vinna fyrir eftirásköttunum.

Sumt (reyndar margt) í skattalagatillögunum er líka þannig að það er óásættanlegt að það komi til framkvæmda núna við þessi áramót og eðlilegra að miðað sé við næstu áramót (2010/2011).  Það stenst ekki stjórnsýslulög og stjórnarskrá að setja á íþyngjandi skatta aftur í tímann, en sumar af breytingum miða einmitt að því eins og m.a. má lesa í athugasemdum SA.

 

Gera alvarlegar athugasemdir við skattabreytingar

Stýrivaxtamunur

Stýrivextir í Bretlandi verða áfram óbreyttir eins og segir í fyrirsögn mbl.  En það athyglisverða er að prósentan er 0,5.   Hér á landi var loks verið að lækka úr 11% niður í 10% og þó að stýrivextir hafa á tveimur mánuðum verið lækkaðir samtals um 2 prósentustig þá eru þeir ennþá alltof háir og valda einungis því að fjármagn einstaklinga og fyrirtækja er alltof dýrt.  Ég get ekki séð að þeir gerir neitt gagn fyrir efnahagslífið né stýri einu né neinu til bóta þegar þeir eru svona ofboðslega háir.   Víða um heim er búið að lækka þessi vexti niður undir núllið og nægir að nefna Bretland, Bandaríkin og Svíþjóð til sögunnar.  Samt er kreppa í þessum löndum eins og hér og í Bretlandi nægir þetta ekki til að efnahagslífið rétti úr kútnum.  Hið sama væri ekki upp á teningnum hér ef virkilega væri farið í almennilega lækkun og vextirnir færu niður fyrir 5%.  Slíkt myndi setja hjól atvinnulífsins í gang hér með tilheyrandi fækkum atvinnulausra og auknum tekjum fyrir ríkissjóð, en því lengur sem það dregst því minni lífsþróttur er til staðar í atvinnulífinu.

Óbreyttir stýrivextir í Bretlandi

Seinagangur bankakerfisins og klaufagangur Arion banka

Ýmislegt í þjónustu bankana fer aftur dag frá degi.  Það sem pirrar mig afskaplega mikið er að nú annan mánuðinn í röð er einhver seinagangur í því að birta í heimabanka næstu afborgun lána.   Í mínu tilfelli er um 2 smávægileg skuldabréf í Arion banka sem svo sem taka ekki miklum breytingum frá mánuði til mánaðar, en eru á gjalddaga 17. dag hvers mánaðar.  Nú viku fyrir gjalddaga er útilokað fyrir mig að sjá hvað á að greiða.  Í síðasta mánuði komu upplýsingarnar degi fyrir gjalddagann og greiðsluseðlarnir komu í pósti (sem svo er alveg óþarft og ég hef beðið um að sé hætt), nokkru eftir gjalddaga.   Það er sjálfsögð kurteisi og þjónusta við viðskiptavini bankans að svona upplýsingar liggi fyrir með nokkrum fyrirvara og þannig hefur það verið mörg undanfarin ár að þetta hefur verið ljós eigi síðar en 10 dögum fyrir gjalddaga og jafnvel enn fyrr.

Annað varðandi Arion banka.   Valið á nafninu er virkilega vanhugsað en það er ekki í fyrsta skipti hjá þessu sama banka.  Fyrir nokkrum árum hét hann KB banki og þá kom í ljós að lénið kb.is var ekki laust enda notað af nær aldargömlu rótgrónu fyrirtæki Kaupfélagi Borgfirðinga.  Nú er ekki á lausu lénið arion.is heldur verður bankinn að notast við arionbanki.is sem er langt og óþjált lén. 

Stórgallaðar skattatillögur

Breytingar á skattalögum sem ríkisstjórnin vill helst lauma hratt í gegnum Alþingi og helst án umræðu eru mein gallaðar að mörgu leiti.  Mig langar að benda á nokkur atriði:

Þriggja þrepa tekjuskattskerfi með flóknum millifærslumöguleikum eyðileggur kerfið.  Um það þarf ekki að hafa fleiri orð.

Jöfnuður milli samskattaðra einstaklinga er ekki lengur til staðar, en ég vil meina að eitt mesta framfaraspori í launajafnréttismálum hafi verið náð eftir að persónuafsláttur var færanlegur að fullu milli aðila og sama skattprósentan var á öll laun beggja framteljenda.  Í fyrirliggjandi tillögum er þetta eyðilagt og í stað þess að setja fram í tillögunum fjárhæðir miðað við einstakling annars vegar og samskattaða aðila hins vegar þá er verið að búa til flókið kerfi á millifærslum.  Einfalt væri að segja að lægsta þrep næði upp í kr. 2.400.000 á ári hjá einstaklingi en kr. 4.800.000 hjá hjónum eða samsköttuðum einstaklingum.  (Reyndar vildi ég sjá þetta sem 3.000.000/6.000.000).

Þrepin í skattkerfinu eru líka furðulega lág.  Þannig er miðað við 200.000 á mánuði, en ekki t.d. 250.000 í lægsta þrepi.   Einnig er það sem ekki hefur farið hátt í umræðunni verið að auka langmest skattana á þá sem hafa tekjur á milli 650.000 og 700.000 en ekki verið að hækka neitt að ráði þá sem eru yfir 700.000.  Ég hefði viljað sjá þrepin fyrst þau eru að koma miðuð við 250.000 og 700.000.

Á síðasta ári var settur á (1.júlí) hátekjuskattur þannig að laun yfir 700.000 fengu á sig 32,1% skatt auk útsvars en á árinu 2010 fer þetta í 33% auk útsvars.  Hins vegar þá voru laun á bilinu frá 650.001 til 700.000 að fá á sig 24,1% skatt árið 2009 en fara nú í 33% eða hækka um 8,9 prósentustig á einu bretti (tekjuskattsfjárhæð hækkar semsagt um 37% fyrir þetta launabil).

Fjármagnstekjuskatt er verið að hækka um 80% (úr 10% upp í 18%, hækkaði reyndar upp í 15% 1.júlí), en tækifærið er ekki nýtt til þess að skilgreina skattinn upp á nýtt og hætta að túlka hann eingöngu sem tekjuskatt og láta sveitarfélögin njóta hluta af þessum tekjum.  (Frítekjumarkið mætti lenda af sama þunga á bæði ríki og sveitarfélögum).

Auðlegðarskatturinn er furðulegt fyrirbæri, en þar er miðað við hreina eign upp á yfir 90 milljónir hjá einstaklingi en 120 milljónir hjá þeim sem telja fram saman.  Þarna er verið að skapa aðstæður til þess að fólk óski eftir því að telja ekki saman fram og þar með fær hópur sem á þetta miklar eignir skatta á sig sem einstaklingar en ekki sambýlingar.   Ríkið gæti hæglega orðið af miklum tekjum vegna þessa og ég skil ekki hverjum er verið að hlífa þarna.  Kannski þekktum athafnahjónum ?

Auk þess er inn í útreikningi á hreinni eign þeirra sem geta lent í auðlegðarskattinum mjög flókinn útreikningur á hlutabréfaeign og mér sýnist ljóst að taka þurfi upp álagningu hjá þessum hópi á hverju ári, eftir að endanleg álagning á fyrirtæki liggur fyrir og allir ársreikningar hafa skilað sér.

Þetta eru bara nokkur atriði sem auðvelt er að lagfæra í tillögunum án þess að kollvarpa skattahugmyndunum í heild sinni.

Refsigleði stjórnvalda og furðulegar röksemdir

Nú liggur fyrir frumvarp félagsmálaráðherra um breytingar á atvinnuleysisbótum.  Margt sérkennilegt er þar á ferðinni og ég ætla að staldra við tvennt.  Annars vegar hversu ómaklega er verið að vega að sjálfstætt starfandi einstaklingum í þessu frumvarpi og hins vegar er verið að tvöfalda refsiálagið.

Í frétt mbl.is um málið segir.

Réttur sjálfstætt starfandi einstaklinga verður takmarkaður skv. frumvarpinu þannig að þeir geti að hámarki fengið greiddar hlutaatvinnuleysisbætur í þrjá mánuði. ,,Sá tími þykir hæfilegur svo að sjálfstætt starfandi einstaklingur geti brugðist við tímabundnum samdrætti í rekstrinum og geti þá nýtt tímann til frekari ráðstafana, svo sem að kanna hvort rekstrarforsendur séu brostnar,“segir í frumvarpinu.

Hver ákveður það að þriggja mánaða tími sé "hæfilegur" til þess að bregðast við samdrætti í rekstri ?  Hvernig á sjálfstætt starfandi að geta skellt öllu í lás hjá sér og hætt starfsemi og þar með komið rekstrarfjármunum í verð við þær aðstæður sem nú eru ?  Og hvernig á að vera hægt að ætlast til þess að þessi hópur fólk sé tilbúinn til starfa þegar verkefni skapast ?

Í fréttinni segir ennfremur:

Fram kemur að erfiðlega hafi reynst í framkvæmd að meta samdrátt í rekstri sjálfstætt starfandi einstaklinga. ,,Þar af leiðandi hefur ákvæðið verið til þess fallið að stuðla að ákveðinni misnotkun innan kerfisins. Í október var 821 sjálfstætt starfandi einstaklingur skráður á atvinnuleysisskrá vegna samdráttar í rekstri en þeir einstaklingar sem þegar hafa nýtt sér þetta ákvæði geta fengið áfram greiddar atvinnuleysisbætur í allt að tvo mánuði.

Þetta er bara alrangt.   Það er ekki erfitt í framkvæmd að meta samdrátt í rekstri.  Til að mynda þá sýna framlagðar virðisaukaskattsskýrslur það glögglega hver þróunin hefur orðið í tekjum og kostnaði.  Sú skylda hvílir á þessum hópi að senda reglulega upplýsingar um reiknað endurgjald og um virðisaukaskattsuppgjör og að auki hefur Vinnumálastofnun beinan aðgang að RSK varðandi þessar upplýsingar.  Þessum virðisaukaskattsskýrslum verða stjórnvöld að geta treyst og ég dreg  það stórlega í efa að menn gefi upp rangar fjárhæðir því álögur sem á slíkt koma eru það íþyngjandi, auk þess sem verið hefur í lögum ákvæði um 15% álag á endurkröfurétt á atvinnuleysisbótum.

Þetta síðasta leiðir hugann að hinu atriðinu í frumvarpinu sem ég ætla að tjá mig um:

Þá á að gera Vinnumálastofnun auðveldara um vik að innheimta ofgreiddar atvinnuleysisbætur og fæðingarorlofsgreiðslur en til viðbótar er gert ráð fyrir að álag við endurgreiðslu á slíkum ofgreiddum bótum verði hækkað úr 15% í 30%.

Hvers konar refsigleði er þetta ?  30% álag á ofgreiðslu bóta ?  Ég get ekki ímyndað mér að nokkur einstaklingur svo mikið sem reyni að svindla á kerfi með slíkt yfir höfði sér og var 15% álagið nógu hátt fyrir.

Er ekki í lagi að treysta fólki.  Treysta kjósendum þessa lands til þess að vera ekki að stunda svindl og gera ráð fyrir fyrirfram að þeir sem neyðast til að þiggja atvinnuleysisbætur séu heiðarlegt fólk upp til hópa ?   Ég veit það og þekki mörg dæmi um að það hafa verið mjög þungbær spor hjá fólki að hafa sig í það að sækja um atvinnuleysisbætur og það eru án efa fjölmargir sjálfstætt starfandi sem ekki hafa farið út í það að sækja um bætur þrátt fyrir samdrátt, ekki vegna þess að þeim hefði veitt af smá stuðningi, heldur sökum þess að mönnum finnst skömm að þurfa að leita eftir "ölmusu" frá hinu opinbera.

En þetta skilja ráðamenn ekki og sjá ekki.

Hertar reglur og þak á hlutabætur

Dæmigert fyrir skattpíningarflokkinn

"Að sjálfsögðu" leggur fulltrúi Vinstri-grænna í borgarstjórn það til að skattar séu hækkaðir á íbúa borgarinnar.  Það er alveg með ólíkindum hvað þessi flokkur nýtur þess að skattpína þegna landsins.

Vill hámarksútsvar í Reykjavík

Hver er þá fjárhæðin sem ríkið þarf að greiða ?

Af hverju fá blaðamenn það ekki nákvæmlega á hreint hvaða fjárhæðir ríkið leggur fram vegna Arion banka ?  Fréttir mbl og að ég tali nú ekki um vísis eru handónýtar.

Fréttatilkynning fjármálaráðuneytisins segir ekkert um þetta nákvæmlega og þá eiga blaðamenn að spyrja og upplýsa þjóðina.

Ég vil vita fjárhæðina sem ríkið leggur bankanum til í formi hlutafjár annars vegar og hins vegar hver sé núverandi fjárhæð hins víkjandi láns bæði í íslenskum krónum sem og í þeim myntum sem miðað er við.  Enn fremur hvort einhverjar aðrar fjárhæðir hafi verið um að ræða síðan þessi nýi banki var stofnaður á grunni gamla Kaupþings.

Þetta á ekkert að vera eitthvað "hérumbil og sirka".  Nákvæmar upplýsingar, takk fyrir.

Niðurstaðan endurspeglar traust til Arion banka

Ný bylgja uppsagna starfsfólks á vinnumarkaði að hefjast

Tilvitnun í frétt á mbl.is í dag:

"Ölgerðin sagði í gær upp 35 starfsmönnum og sagði Andri Þór Guðmundsson, forstjóri, ástæðuna þá að verið væri að bregðast við minnkandi eftirspurn vegna skattahækkana."

Auðvitað er þetta rétt, hvað sem Steingrímur Joð reynir að klóra í bakkann.  Í viðtalinu við mbl.is segir hann (Steingrímur) orðrétt að eins og komið hafi fram hjá forstjóra Ölgerðarinnar "að þetta hefði verið gott ár hjá þeim, fram að þessu"

Þetta eru athylgisverð orð, "fram að þessu". Það er nefnilega komið svo að skattahækkanir eru komnar yfir þolmörk.  Nýjustu hækkanir og fyrirhugaðar skattabreytingar fara langt yfir strikið og afleyðingin er að fjöldi fólks missir atvinnuna og enn eykst vandi Atvinnuleysistryggingasjóðs.

Það er ekki vafi í mínum huga að ástæða þessara uppsagna eru m.a. eftirtaldar:

Hækkun sykurskatts (vsk úr 7% í 14% á drykkjarvörur aðrar en áfengi), enn ein hækkun á áfengisgjaldi sem fyrir löngu er búið að hækka meira en góðu hópi gengir, í það minnsta með jafnstuttu millibili en það hafa orðið fjölmargar hækkanir á því síðan í okt. 2008 og nú á enn að hækka um áramótin.  Hækkun vörugjalda spilar þarna líka stórt hlutverk, hækkun tryggingargjalds sem hækkar launakostnað fyrirtækja verulega, hækkun tekjuskatts á fyrirtæki sem og hækkun tekjuskatta einstaklinga sem þrengir að kaupgetu.

Allar þessar skattahækkanir hafa veruleg áhrif á neyslu í landinu, en þessi ríkisstjórn virðist ekki skilja það að leið út úr vandanum (sérstaklega erfiðri stöðu ríkissjóðs) er að örva neyslu í landinu og ná þannig í auknar skatttekjur í formi skatta af meira magni, en ekki hærri skatta af mikið minna magni.

„Spurning hvaða ástæður liggja að baki“

Sjálfstætt starfandi greiða 8,6% í tryggingargjald árið 2010 eins og aðrir

Ég leyfi mér að birta hérna hluta úr fréttinni á mbl.is þar sem fjallað er um bótarétt sjálfstætt starfandi einstaklinga.

"Helstu breytingar snerta m.a.  bótarétt fólks með sjálfsætt starfandi rekstur og enn með reksturinn opinn. Réttur þessa hóps til bóta var tryggður með ákvæði sem sett var inn í lögin eftir hrunið síðasta haust, en mun nú skerðast við 3 mánuði. Það þýðir að viðkomandi geta aðeins fengið bætur samhliða því að halda rekstrinum opnum í 3 mánuði. Að þeim tíma liðnum verða þeir að loka rekstrinum og kom á bætur sem hefðbundnir launamenn, eða hverfa af bótum og sinna sínum rekstri óstuddir. „Við trúum að það verði langstærsti hópurinn, sem geti að þessum tíma liðnum treyst sér til að lifa af sínum rekstri og þurfi ekki á atvinnuleysisbótum að halda," segir Gissur."

Eftir hrunið 2008 voru sett inn í lög ákvæði til bráðabyrða sem gaf þeim sjálfstætt starfandi einstaklingum sem urðu fyrir verulegri skerðingu á verkefnum og tekjuöflunarmöguleikum rétt á því að geta fengið atvinnuleysisbætur.  Þetta er að mörgu leiti ekki ósvipað því að fólk sem missir hluta af vinnu getur fengið bætur á móti.   Sjálfstætt starfandi eru þó nokkuð annarri stöðu en einstaklingur á vinnumarkaði. 

Sjálfstætt starfandi verða að greiða sama hlutfall í tryggingargjald og annar atvinnurekstur og það gjald hækkaði úr 5,34% eins og það var til 30.júní s.l í 7% og nú á það að hækka í 8,6% um áramót.  Þeir hljóta því að eiga sömu réttindi til bóta og aðrir einstaklingar.

Sjálfstætt starfandi einstaklingar þurfa að standa undir alls konar föstum kostnaði í sínum rekstri hverjar sem tekjurnar eru.  Þar eru m.a. ýmis þjónustugjöld og föst gjöld af hugbúnaði,  tækjabúnaði, áhöldum og öðrum atvinnutækjum, tryggingar, vexti og afborganir af rekstrarfjármunum og fjölmargt fleira.  Mikill hluti af þessum kostnaði stórhækkaði í kringum og eftir hrunið 2008.  Það er ekkert einfalt mál að leggja skyndilega niður starfsemina og viðkomandi er ekki tiltækur til að taka aftur til starfa á ný hafi hann þurft að losa sig við allt sem að rekstri snýr.

Lagaákvæðið sem sett var eftir hrunið 2008 hefur bjargað fjölda fólks frá gjaldþroti og sem betur fer í sumum tilfellum orðið til þess að viðkomandi var í aðstöðu til að rétta úr kútnum þegar verkefni sköpuðust.  Aðrir eru ennþá í þeirri stöðu að brúttótekjur eru ekki nema brot að því sem þær voru fyrir hrun og meðan ástandið er ekki orðið betra í þjóðfélaginu, þá er ennþá nokkur bið í það að tekjurnar aukist þannig að lífvænlegt sé að starfa sjálfstætt.   Meðal þessa hóps býr hins vegar mikil sérþekking á þeirra sviðum og þetta fólk þarf að vera tiltækt til starfa þegar betur árar.

Reglur í kringum atvinnuleysisbætur til þeirra sem lentu í hruni á brúttótekjum sínum eru mjög strangar og mikið eftirlit haft með þessum hópi og því sá hópur sem síst er þörf á að ráðast á með þeim hætti sem hér er lagt til.  Sjálfstætt starfandi falla sjálfkrafa út ef breytingar verða á högum þeirra.  Ég hef ekki trú á því að þarna sé svindl í gangi enda ennþá auðveldara að fylgjast með því en hjá öðrum hópum.

Verði þessar hugmyndir að veruleika þá munu fjölmargir af þessum einstaklingum einfaldlega lenda í gjaldþrotum með tilheyrandi þjóðfélagslegum tilkostnaði.  Þeir geta þar með ekki hafið störf að nýju því þeir fá ekki möguleika á að fjárfesta á ný í nauðsynlegum búnaði og meðan ástand á atvinnumarkaði er eins og það er þá er verið að dæma viðkomandi einstaklinga til að verða varanlegir bótaþegar með mun meiri tilkostnaði fyrir ríkið.

Meðan ástandið er eins og það er í dag á vinnumarkaði, þá er það þó þannig að sjálfstætt starfandi einstaklinga geta átt í sumum tilfellum betri möguleika en aðrir á inngripum í tímabundin verkefni.  Sum slík verkefni leið af sér stærri og varanlegri verkefni.  Við þær aðstæður þá detta menn að sjálfsögðu út af atvinnuleysisskrá, en með fyrirhuguðum breytinum þá er verið að koma í veg fyrir að þessir einstaklingar séu tiltækir til að taka að sér verkefni og verða þar með af tekjum en sitja í stað þess eftir fastir á atvinnuleysisskrá.

Það er ekki einfalt að hætta skyndilega sjálfstæðum rekstri.  Við ástand eins og nú er í þjóðfélaginu þá er ekki markaður fyrir atvinnutæki viðkomandi.  Að sjálfsögðu er þetta mjög breytilegt eftir starfsemi hvers og eins hversu auðvelt eða erfitt er að hætta og hversu mikið er undir í föstum og breytilegum kostnaði.  Ef viðkomandi aðilum er ekki lengur gert það leyfilegt að ná sér í takmarkaðar og/eða tilfallandi tekjur án þess að falla út af atvinnuleysiskrá og ekki gert kleyft að fara inn á atvinnuleysisbætur sem "launamenn" nema að hafa hætt starfsemi þá er einfaldlega verið að búa til nýjan hóp einstaklinga í mikilli vanskila og gjaldþrotahættu.

Svona hugmyndir um niðurskurð eru settar fram af greinilega miklum þekkingarskorti á aðstöðu þessa hóps.  En kannski líka og ekki síður sökum þess að sjálfstætt starfandi einstaklingar hafa enga málsvara, félög eða samtök sem verja hagsmuni þessara einstaklinga. 

Það er ekki réttlæti eða jöfnuður í því að sjálfstætt starfandi einstaklingur þurfi að greiða fullt tryggingargjald en fá ekki réttindi á móti.  Á þetta hefur mjög mikið skort undanfarin ár.  Ef afnema á svona réttindi þá ætti að afnema skyldugreiðslu tryggingargjaldsins á móti eða jafnvel gera það valkvætt hvort menn greiði tryggingargjald eða ekki og hvort þeir fái þá þjónustu á móti eða hafni henni.

Þessi breyting ef af verður mun kosta þjóðfélagið mun meiri peninga en fyrirhugað er að spara og skapa meira vandræði á fjölmörgum sviðum.

Spara 1,5 milljarða í bótum

Er ekki eitthvað annað meira áríðandi ?

Nú held ég að ég geri eins og Davíð Oddsson um árið og fari og taki út peningana mína í Kaupþing.  Að vísu á ég ekki 400.000 eins og Davíð á sínum tíma, en ég hef verið viðskiptavinur Búnaðarbankans og síðar Kaupþings (og KB banka eins og hann hét um tíma) í fjölda ára og það pirrar mig mjög mikið að þessi banki skuli nú ætla að fara að skipta um nafn.

Kannski gera þeir eins og Glitnir og breyta aftur til baka í gamla nafnið.  Ég gæti svo sem sætt mig við það að fá gamla Búnaðarbankann aftur, en Esja, Atlantis (hefði frekar átt við þann gamla) eða Stefnir eins og þau nöfn hljóma sem nefnd voru á visir.is í dag hugnast mér engan veginn.  Esja gæti svo sem vísað til þess að bankinn er í óða önn að loka útibúum utan höfuðborgarsvæðisins.

Þessi banki þarf meira á því að halda að bæta símsvörun sína.  Það er óþolandi að ná ekki klukkutímum og dögum og jafnvel vikum saman í það fólk sem maður þarf að ná í.  Bankastarfsemi á að vera þannig að viðskiptavinur sé afgreiddur hratt og vel, í það minnst að hann fái að koma erindi sínu á framfæri.  Ýmislegt annað er að í þessu "ríkisfyrirtæki" en nafnið sjálft.

Nýtt nafn á Kaupþing?